Me pēhea e kore ai e kuhu ki tēnei kaupapa, inārā, koinei tētahi kaupapa e āki nei te whakarauoratanga mai o tō tātou reo. Nā te reo Māori, nā ngā tikanga Māori i tangata mai ai ahau i tēnei ao weriweri. Me whakatipu tātou i ā tātou tamariki ki ēnei taonga, e kore ai rātou e paheke ki te hē. E whakapono nui ana ahau ki ngā kōrero a ō tātou pakeke e mea ana, ki te whakatōkia te reo Māori ki te whatumanawa, ki te hinengaro, ki te māngai hoki, ka ora te reo Māori me te tangata. Ka mutu, kei te reo ngā kura huna e tūwhera ai te tangata ki te ahurea whakaaro Māori. He mano hua ka puta i tēnei kaupapa. Ko te kōrerotia o te reo tetahi hua nui. Mā tō rourou, mā tōku rourou, ka ora ai te iwi. Mā tō reo Māori, mā tōku reo Māori, ka ora ai te ao Māori. Whītiki tauā!
Comments