He arawātea hou, whakahirahira hoki a Waha Kōrero mō te hunga kōrero Māori, māori mai, tino matatau mai. Ko te reo tāwhiri tēnei o tēnei whakataetae ahurei ki ngā kaiwhakataetae kia takatūria ai ō rātou reo, ō rātou hinengaro kia hoka i te whakatairanga whakanui ā-motu mō te pakeke 18 tau pakeke ake.
He reo rōreka, rerehua te reo Māori, tōna koi, ōna whakataunga kōrero, ōna wheko tāngata mai i te whatinga-ā-nuku, te whatinga-ā-rangi. I ngā rā o mua, kua hoka, kua tiu te reo Māori i ngā maunga, puta noa i ngā arawai o tēnei whenua, ko te tangi maiorooro o ngā manu i te hekenga o Tama-nui-te-rā tōna rite.
Nā runga i ngā whakapaunga kaha i āta whakaritea kua tū anō te reo Māori hei tohu mana, hei taura whiriwhiri i ngā tāngata katoa o Aotearoa, ka mutu, hei taonga noho ahurei anō hoki ki mua i te aroaro hei tirohanga mō te ao katoa.
I te tau 2024 kua kōkiri kaupapa hōu a Te Taura Whiri i Te Wiki o te Reo Māori – ko Waha Kōrero.
Ka tū te whiringa toa o Waha Kōrero i te Rāhoroi 21 o Mahuru 2024 ki Te Whanganui-a-Tara.
Tēnā, kia kotahi tonu mai ki tētahi pō i te kairangi ngangahau o te reo Māori. Tekau mā rua ngā kōkō tātākī nō ngā hau e whā o Aotearoa ka whakaatu i te pukuhohe, i te atamai me te wahapū hoki!
Ngā aratohu o te whakataetae
E wātea ana a Waha Kōrero ki ngā tāngata katoa e whakatutuki ana i ngā paearu e whai ake nei;
- me pakeke ake i te 18 tau i te rēhitatanga mai o tō tono
- kei Aotearoa koe e noho ana
- mehemea kāore koe e noho ana ki Aotearoa, ki te kōwhiria koe mō te whiringa toa ka tū ki Te Whanganui-a-Tara māu e waha ngā utu mō ngā waka rererangi.
- kei te taumata kairangi te matatau ki te reo Māori, pērā ki ērā kua whakamāramahia mai i ngā paearu matatau.
E wātea ana koe kia whai wāhi mai ki te whiringa taumātakitahi ka tū ki runga ipurangi (12 - 23 Hereturikōkā 2024), ā-kanohi anō hoki ki te whiringa toa ka tū ki Te Whanganui-a-Tara ā te 21 Mahuru 2024.
Me mōhio koe: Kia whai wāhi mai me whakaae e ngā kaiwhakauru 12 o te whiringa toa kia arotakea e te pirihimana.
Kia whai wāhi mai koe ki a Waha Kōrero e tika ana;
- Kia ngāwari, kia māia te whakawhitiwhitinga kōrero, me māhorahora, me maringi kau rānei te reo Māori i te waha o te tangata i ngā mahi o ia rā, o ia rā
- Me whakaatu mai koe he hōhonu te puna kupu, me matatau hoki koe ki te whakatakoto tika i te kōrero, i ngā kīanga reo Māori, i ngā whakataukī, whakatauākī, me ngā kīwaha
- Ka taea te kōrero tautuutu ki ētahi atu tāngata kōrero Māori, ahakoa te roa o te wā, kāore hoki koe e mate ki te hoki ki te reo Ingarihi
- E mārama whānui ana tō reo ki ētahi atu kaikōrero matatau ki te reo Māori
- E taea ai ngā take matatini e mōhiotia ana e koe te matapaki.
He uaua te ine i te matatau ki te reo Māori, ahakoa te taumata. Ehara i te mea me mahi koe i te Whakamātautau Whakamātauria Tō Reo Māori (LFE), heoi anō hei tauira paerewa whai hua hei whakamārama i ngā pūmanawa matatau, kua whakamahia Te Pou Tarāwaho Whakamātauria Tō Reo Māori mai i te (LFE) ki te whakamōhio i te paerewa whakauru o te Waha Kōrero. Me matatau ake i te taumata 4 kia whai wāhi mai.
Tēnā, whakamahia te whakaahuatanga i runga ake hei aromatawai i tōu ake āheitanga, mehemea he pātai āu me whakapā mai.
E toru ngā whiringa o Waha kōrero, kei raro nei ko ngā taipitopito whānui e pā ana ki ia whiringa. Mō ngā taipitopito whāiti tirohia tā mātou Pukapuka Kaiwhakauru i raro nei.
Te Whiringa Tuatahi:
- E tuwhera ana tēnei whiringa ki ngā tāngata katoa e taea ana ngā paearu whakauru.
- Ka tīpako kaupapa kōrero koe mai i te rārangi o ngā kaupapa kōrero kua oti te whakarite me te hopu i tō kauhau – 2 miniti te roa ka kati te wā.
- Ka whakawāngia tō kauhau ki te rārangi o ngā paearu kua oti te whakarite.
Te Whiringa Tuarua:
- Ka kōkiri ngā kaiwhakataetae tuatahi 40 mai i te Whiringa Tuatahi ki tēnei whiringa.
- Ka tū te Whiringa Tuarua ki runga ipurangi, i tētahi rangatū o ngā wāhanga whakataetae i roto i te marama o Hereturikōkā.
- I te wāhanga i runga ipurangi, ka whakawhiwhia koe ki tētahi āki tupurangi me te 15 miniti ki te whakarite i tō kauhau.
- Kātahi ka haere koe ki te rūma mariko ki mua i ngā kaiwhakawā e rua ki te tuku i te kauhau 5 miniti te roa.
Te Whiringa Tuatoru:
- Ka kōkiri ngā kaiwhakataetae tuatahi 12 mai i te Whiringa Tuarua ki tēnei whiringa whakamutunga.
- Me tae ā-tinana te kaiwhakataetae ki tēnei hui ka tū ki roto o Te Whanganui-a-Tara i Te Wiki o te Reo Māori.
- Ka tū ngā kaitohe ki te papa kōrero i mua i tō mātou pae whakawā tokowhā.
- Ka riro i te toa te tino momoho o te $10,000 me te mana ko ia te toa whakaihuwaka o te katoa o Aotearoa.
E āhei ana ngā taonga hei whakanikoniko i tō kōrero, arā, te tewhatewha, te mere, te poi, arā atu anō. Heoi anō ehara i te mea me mau mai tētahi, kāore hoki he tapeke anō mō te mau.
He mea whakanui a Waha Kōrero i ngā kaikōrero matatau ki te reo Māori me ō rātou pūkenga kōrero tene, tautohetohe, me te koi o te hinengaro. Ehara tēnei i te whakaaturanga o te kounga ki te whaikōrero, te tuku karakia, te taki whakapapa rānei.
Ahakoa kāore e whakapāhunu ana te mihi, te whakapapa me ētahi atu tikanga hanga kōrero Māori ōkawa, me mōhio, e KORE koe e whiwhi wā i tua atu mō ēnei āhuatanga, kāore hoki ēnei i roto i ngā paearu whakawā.
KĀORE e whakaaetia te whakamahi kāri āwhina.
Kāore i whakaritea he wā mō te waiata tautoko hei te mutunga o te kauhau.
KĀORE e whakaaetia te whakamahi o te kangakanga, o te kōrero taera tino anuanu rawa atu rānei.
KĀORE e whakaaetia te kōrero mauāhara
Me whakapuaki ngā taupatupatu pānga kaupapa i waenga i ngā kaiwhakataetae hei te rēhitatanga mai, hei te wā rānei e mōhiotia ana he taupatupatu. Mō ngā mōhiohio e pā ana ki te āhua o te whakahaeretanga o ngā taupatupatu pānga kaupapa e ngā kaiwhakawā, tēnā, tirohia te Wāhanga Whakawā.
Kei ngā kaiwhakawā te mana whakatau whakamutunga.
Kei Te Taura Whiri te mana ki te ākiri i te tono a te kaitono mehemea kāore taua tono i te whakatutuki katoa i ngā herenga me ngā aratohu o te whakataetae Waha Kōrero, ki te puta ake rānei tētahi take e mōrearea ai Te Taura Whiri, tētahi o ana kaimahi, tētahi atu rānei e whai wāhi ana ki te whakataetae Waha Kōrero.
Kei Te Taura Whiri te mana ki te tono i tētahi tūranga i te Whiringa 2, 3 rānei ki te kaiwhakauru tapeke nui o muri mai mehemea kāore e wātea ana tētahi o ngā kaiwhakataetae mō taua Whiringa.
Kāore he okotahi ki ngā ture kua whakapuakina i Waha Kōrero 2024. Ko te tikanga kia mataraharaha ai tēnei ki te katoa o ngā kaiwhakauru.
Tāpui tīkiti i konei
Ngā kaitautoko
Mā te tautoko mai o ā mātou kaimanako, ka tū ai a Waha Kōrero:
ATA
Ko ATA tētahi pakihi pae pāpori taketake e hanga ana i ngā atamira auaha, ā, e whakatairanga ana i ā tātou kaupapa Māori e ahuahu ai te āpōpō pai ake mō ā tātou mokopuna.
Fonterra
Ko Fonterra, Te Matapuna, tētahi pakihi nō Aotearoa ake. Ko ētahi tāngata whenua anō hoki ētahi o ōna kaipupuri hea, ā, tokomaha hoki āna kaimahi Māori. Kua herea te pakihi nei ki te āta pāhekoheko, ki te āta wāriu, ki te āta whakamahi anō hoki i te reo Māori me ōna tikanga i tōna whare.
Wellington City Council
Ko Te Kaunihera o Pōneke i te taha o te mana whenua e herea ana ki tana matapaenga kia tāone reo Māori Te Whanganui ā-Tara i mua i te tau 2040, ā, ka whakanui tonu i te reo hei taonga e tiakina ana, e poipoia ana, e whakatipua ana āno hoki.
Ngā Whiringa Toa 2024
Tamati Waaka
I tipu mai a Tamati Waaka i te mātotorutanga o te reo, i te whārua o Ruātoki, ko te tūāpapa o taua reo rā, ko te whānau, ko ngā marae maha, ko te hāhi Ringatū me te Kura o Tāwera. He pouako reo, tikanga, tū marae, otirā he kaiwhakapāoho hoki; i te reo irirangi, pouaka whakaata me te ipurangi. Ko te kapa haka tāna e kaingākau ana, tatū noa ki ngā pūrākau a te Māori. He toa manu kōrero i roto i ngā tau, he toa whakaihuwaka kapa haka, he pū kōrero ki ngā tū kaupapa maha a te Māori.
Te Wairere Ngaia
He mangainga a Te Wairere o ngā kāwai whakaheke o ngā maunga o Taranaki i te uru me Hikurangi i te rāwhiti, o ngā waka o Tainui me Te Arawa. He uri hoki ia o ngā kaupapa o Te Kīngitanga, o Te Kōhanga Reo, o Ngā Kura Kaupapa Māori o Te Aho Matua, o Ngā Kura-ā-Iwi, o Te Pae Kaakaa o Waikato-Tainui, me Te Kaapunipuni Reo o Taranaki. I whakatupuria ia ki roto i te mātotorutanga o te reo me ngā tikanga Māori, hei painga mō tōna whānau, mō ōna hapū, mō ōna iwi. Ko tana aronga nui i tēnei ao ko te whāngai tonu i te reo me ngā tikanga ki āna tamariki kia tū rangatira ai rātou hei Māori. Pai mārire.
Regan Kupu Stokes
Ko Kupu tētahi pāpaka o Rangataua; he uri ia nō Ngāi Te Rangi, nō Ngā Pōtiki a Tamapahore, nō Ngāti Pūkenga, nō Ngāti Ranginui, nō Tūhourangi, nō Tūwharetoa, nō Ngātiwai hoki. Nō Tauranga tana matua, nō Ingarangi tana whaea. Kei Ōhinehou rātau ko tana whānau e noho ana. He pāpā, he kaiako, he kaiwhakamāori a Kupu; he pakihi tāna hei whakaako i te reo ki ngā tāngata o ngā tari kāwanatanga, o ngā whakahaere, o ngā kamupene, o ngā kura hoki, puta noa i te motu. He kaitito toikupu, he kaiwhakatangitangi hoki ia.
Watene Campbell
He Wīwī, he Naati, he Whanokē nō Porourangi, he uri nō te ure whakaparatī, e whai nei kia Tauakī te tū, kia Taiki te rere o ngā kōrero, pēnei me ōna tūtohu whenua o roto o Ngāti Awa, anei e mihi atu nei. He raukura a Watene nō Te Aho Matua, he tamaiti nō te Kura Kaupapa Māori, he tangata kaha ki te noho ki ngā rekereke o tōna kuia i te wā i a ia. I pakeke mai ia ki te reo Māori, ka mutu, i āta whakangungua ia ki ngā āhuatanga o tō tātau reo me ā tātau tikanga i te kura, i ngā kura reo, i te whare wānanga, me Te Whare Makatea o Te Pōkaitara anō hoki.
Te Ngaru Wehi
I heke iho mai rā a Te Ngaru i ngā niao o te waka o Tainui. Otirā, ko Ōkapu, ko Mōkai Kāinga ngā marae. Ka whānau mai nei ia ki tēnei ao, ka tukuna ia e ōna mātua kia noho ake ki te mātōtorutanga o te ao Māori. Ka haere nei ia ki Te Kōhanga Reo o ngā Kūaka, kātahi ki Tōku Māpihi Maurea ako ai. Ka tekau ōna tau, ka hūnuku rātou kotōna whānau ki Te Papaioea, ka tukuna anō ia ki tētehi kura kaupapa Māoriako ai. Ko te reo Māori te pou o tana ao, koia te pou o ana mahi katoa, wiki atu, wiki mai.Ka mutu, he mōkai anō hoki ia ki Te Wānanga o Aotearoa e whakaako nei i te reo ki tōna taumata kairangi.
Te Kuru Dewes
He uri a Te Kuru o te Marama nō Te Arawa me Ngāti Porou. He raukura ia nō te Kōhanga Reo me te Kura Kaupapa Māori. I tutuki i a Te Kuru o te Marama te Tohu Paerua Reo Māori i Te Whare Wānanga o Waikato. He ika a Whiro hoki ia nō Te Panekiretanga o Te Reo. Kei a ia tāna tohu whakamāori mō te reo ā-tuhi me te reo ā-waha, he mea whakamana nā Te Taura Whiri i te Reo Māori. He kaiārahi reo Māori a Te Kuru o te Marama i te ao pāpāho, he kaitohutohu kiriata, he kaitito waiata, he kaituhi anō hoki. E whakapono ana a Te Kuru o te Marama ki te reo Māori hei poutokomanawa e tū pakari ai te whare whakaaro Māori.
Jacob McGregor
He uri nō Ngāti Raukawa te Au ki te Tonga, Ngā Rauru Kītahi, me Te Whānau a Apanui. I tupu ake a Jacob ki ngā tahataha o te awa o Whanganui, nō reira tōna reo. Ahakoa he Māori ia, kāore ia i whakatupuria ki te reo Māori, i te ao Māori tūturu rānei. He mea whāngai te reo ki ia i te Kura Tuarua o Whanganui e ana kaiako reo Māori, pērā i a Marama Allen. Ka nui tana mihi ki a ia i tana whakatō i te kākano reo Māori ki roto i te ngākau. Nā ōna mātua me ōna whaene o tōna taha Rauru taua kākano i poipoi kia Taranaki ai te reo. Ka mutu, nā ōna kaiako ki Te Herenga Waka i whakapuāwai tōna reo kia tika ai, kia kounga ai, kia Māori ai. I ēnei rangi nei, he Pou Ārahi ia ki tētahi kamupene whakatairanga, he kaiwhakamāori hoki. Ka nanaiore atu ia ki te whakamahi i te reo Māori i ia rā, i roto i āna mahi, i te kāinga me tana tāne, i te taha hoki o āna irāmutu kōrero Māori.
Tayla Faddy
Ko Ranginui ki runga, ko Papatūānuku ki raro Ko te Tai Tokerau ki waenganui. Tihei mauri ora! Ki te taha o tōna tupuna matua, ko Ngāti Whātua te iwi, ko Te Uri o Hau te hapū. Ki te taha o tōna tupuna whaea, ko Te Rarawa te iwi, ko Ngāti Manawa te hapū. He mea whakatupu ia e ōna tūpuna. He tauira a Tayla ki Waipapa Taumata Rau, e whai ana i tana tohu kaiako. E ngākau nui ana ia ki te reo Māori, otirā ki te oranga tonutanga o tō tātou reo, ā haere ake nei. Nā ōna tūpuna i aroha ai ia ki te reo Māori, ā, ko tana tino hiahia kia rongo hoki ā tātou tamariki, mokopuna ki taua aroha anō.
Raniera Proctor
Mai i Hikurangi ki Ōraki, he uri tēnei nō Te Tai Rāwhiti. Ko Ngāi Tāmanuhiri, ko Ngāti Uepōhatu, rātou ko Ngāti Porou ngā iwi. Ko Rāniera Procter tēnei, he manu pīrere nō Te Kōhanga Reo, he Raukura nō Te Kura Kaupapa Māori, he morimoringa nā Ian rāua ko Kerry Procter. Ōna mātua i ako i te reo nei hei reo tuarua, ka pono rāua ki tā rāua whakatau kia reo māori ā rāua uri. Tokowhā ana tamariki, ko Malea, ko Waimea, ko Makaia, ā, ka whā ai ki tā rāua ko Kāwaiwhakaheke tamāhine mate tahe i ngā marama tata nei, i a Hinepūororangi. Mō rātou ana mahi me tana tū. Ko te whakarauora reo, whakarauora ahurea, whakamāui ake i ō tātou whānau āna mahi. E mau nei ia ki ngā pōtae o te heamana i ngā kaupapa o Te Poari Matua o Te Kōhanga Reo, o Te Matakahuki, o Te Taumata - Ihi Aotearoa, o Te Kura Kaupapa Māori o Ngā Uri a Māui anō hoki.
Tauawhi Bonilla
Ko Tauawhi Bonilla tēnei, ko Ngāpuhi, ko Ngāti Porou ngā iwi. He Māori ki te taha o tana māmā, he Latino ki te taha o tana pāpā. He raukura ia nō Te Aho Matua, nō Ngā Mokopuna, nō Maungārongo, he tama ō mua nō Te Aute Kāreti anō hoki. Mohoa nei, he tauira ture ki Waipapa Taumata Rau. Kei Waikato ia e noho ana. He nui tonu ngā mea e ngākaunui ana ki a ia. Te taha ki tōna Māoritanga, ko tōna reo, ko ngā kōrero tuku iho, ko ngā karakia, ngā ariā o ngā tūpuna, kapa haka, whaikōrero, ngā pūoro me ngā rākau o te riri. Te taha ki ana whāinga ā-mahi, kia whai wāhi atu ki te rāngai ahumoni me te ratonga whakahaere pūtea haumi, i te putanga o tana ihu i tana tohu ture me tana tohu paerua ahumoni.
Te Rangimonoa Tahi-Rangihau
Ka whai pānga a Te Rangimonoa ki ngā hapū maha o roto o Ngai Tūhoe, me ngā iwi maha hoki o te takere o te waka o Te Arawa. I whānau mai ia ki runga o Pukeroa i Rotorua. He mokopuna nā te kōhanga reo o Te Rongopai, rāua ko te kohanga reo o Pukeroa Oruawhata. I whakapakekehia mai ia i te kōhanga o Tuhoe, i te mārua o Ruatāhuna "paku kore". I waimarie ia ki te tipu mai ki ngā rekereke o wōna karawa i ngā rā Tekaumārua o te haahi Ringatū, me ngā hui nui o te iwi. I kuraina hoki ia ki Te Wharekura o Huirau, nō reira i tino aro ai ia ki ngā ahuatanga o tō tātou reo. Kai Te Rotoruanui tonu rātau ko tana hoa rangatira me tana whānau e noho ana, toko rima a rāua tamariki kai te Te Kura Kaupapa Māori o Ruamata rātau e ako ana. He kaikirimana tana mahi i tēnei wā, he whai i te oranga o tana whānau te mahinga nui.
James (Hēmi) Akuhata
He mokopuna ia a Ihaka rāua ko Hine Rua, a Te Hiko o te rangi rāua ko Hāriata Akuhata. Ko Te Taahe rāua ko Hine Akuhata ōna mātua. Ko Sharron Handscomb tōna hoa rangatira, ā, tokotoru ā rāua tamariki. Ko Te Purewa rātou ko Rīria, ko Te Miringa ō rātou ingoa. Ko ngā mea mīharo ki a ia, ko te whai wāhi atu ki ana tamariki i roto i wā rātou kaupapa. He kaha nō tāna tama a Te Purewa ki te tākaro kī-o-rahi, pā whutupōro, tae atu ki te mahi kapa haka. He tino ringa toi, he kaituhituhi anō hoki tāna tamāhine a Rīria. Ko te pōtiki ko Te Miringa, ā, he rata hoki ia ki ngā mahi toi, mahi hākina, ā, he pai ki a rātou tahi te waiata mōteatea me te takitaki karakia. Ko tā Hēmi he tuku i ngā kōrero, me ngā mahi a ōna kuia, koroua, a ōna mātua hoki, ki āna tamariki, kia kore ai te kākano i ruia mai i Rangiātea e ngaro, engari kia tipu, ohi, whanake hoki.
Ngā Kaiwhakawā me te Kaiwhakataki 2024
Stacey Morrison (Kaiwhakataki)
Te Arawa, Ngāi Tahu
He kaipāpāho reo irirangi, pouaka whakaata hoki, he kaituhi, he māmā, he aumangea mō te reo Māori mai rā anō a Stacey Morrison (Te Arawa, Ngāi Tahu). Ko ia tētahi o ngā kaituhi o Māori at Home me Māori Made Fun i te taha o tōna hoa rangatira a Scotty Morrison, ko ia hoki tētahi kaituhi o te pukapuka Kia Kaha: A storybook of Māori who changed the world i te taha o Jeremy Sherlock. I riro i tēnei pukapuka te tohu NZ Booklover's Best Children's Book me te tohu Storylines Notable Non-fiction Award. Ahakoa kāore a Stacey i pakeke mai i roto i te reo Māori, i puta ia hei ika a Whiro o te kaupapa whakahirahira o Te Panekiretanga o te Reo, waihoki, kua whakatairangitia e ia te reo Māori ki te tini me te mano o Aotearoa. Kua riro i a Stacey ētahi tohu whakahirahira mō tana mahi tautoko i te reo Māori, heoi anō, e ngākaunui ana ia ki ngā mahi āki i te marea ki te ako, ki te whakamahi i te reo tuatahi o Aotearoa.
Hinurewa Poutu
Ngāti Rangi, Te Āti Haunui-a-Pāpārangi, Ngāti Maniapoto
Kua roa nei a Tākuta Hinurewa Poutu e ū ana ki te whakarauora, ki te whakatairanga anō hoki i te reo Māori. Nō Ngāti Rangi, nō Te Āti Hanui-a-Pāpārangi, nō Ngāti Maniapoto, otirā, he raukura nō te kōhanga reo, nō te kura kaupapa Māori, nō te wharekura hoki. I te tau 2000, i toa i a ia ngā wāhanga o Pei Te Hurinui me te Korimako i te whakataetae Manu Kōrero. He mea whai raihana whakawhiti reo a ia, he whakataki hōtaka pouaka whakaata, he kaiārahi reo, he pouako, ka mutu, i tōna wā he kaiwhiri i Te Taura Whiri i te Reo Māori. I puta tōna ihu i Te Panekiretanga o te Reo, i riro hoki i a ia tana tohu kairangai i Te Kunenga ki Pūrehuroa. He mea aro tana rangahau ki te kōrero Māori a te hunga taiohi. I tēnei wā, ko ia te Kaiurungi Reo ki Whakaata Māori.
Robert Pouwhare
Ngāti Haka, Tūhoe
Kua 43 ngā tau e mahi ana a Robert Pouwhare (Ngāti Haka, Tūhoe) hei kaitohu, hei tumu whakaputa pouaka whakaata, he kaihanga taupānga ōna whēako i te ao pāpāho. Nāna i whakaputa, i rangahau, i kaitohu ngā kiriata maha, ngā hotaka rangatahi, pakiwaituhi tāoreore hākoritanga ahurua/ahutoru (2D, 3D). He kaitito waiata pūoro hoki ia mō ngā waiata neke atu i te 50 mā ngā kōhungahunga o Te Kōhanga Reo mō runga pouaka whakaata, i runga i te ngākau titikaha ki te whakarauora i te reo. Ko ia tētahi o te Manatōpu Te Reo Māori i whakatakoto i te Petihana mō Te Reo i te tau 1972 ki te pāremata. Mai reira ka uru te reo ki ngā kura, ki runga reo irirangi me te pouaka whakaata – ko ia tētahi i timata i te raupapa hōtaka Māori tuatahi a Koha i 1980. Ka tau te Ture Reo Maori 1987 ka tū a Whakaata Māori I 2004. He kaiwhakamāori ā-tuhi, ā-waha ia mō Te Puna i Te Taura Whiri i te Reo Māori.
Oriini Kaipara
Tūhoe, Ngāti Awa, Tūwharetoa, Te Arawa
Kua roa nei a Oriini Kaipara (Tūhoe, Ngāti Awa, Tūwharetoa, Te Arawa) e tū hei kaihāpai mō te reo Māori i roto i te ao pāpāho. I tīmata tana umanga nui ake i te rua tekau tau te roa ki Mai FM i Tāmaki Makaurau, i te tau 2004 i haere ia ki Waka Huia hei kairipoata. Kua mahi ia hei kaikawe pūrongo, hei kaiwhakaputa, hei kairipoata hoki mō Te Karere, i whakakanohi hoki ia i te whakaaturanga Native Affairs. I te tau 2019 i hūnuku ia ki tētahi tūranga hou hei kaikawe pūrongo mō 1 News. I taua wā ko ia tērā i kite i ngā whakaaturanga pāpāho puta noa i te ao, i te mea ko ia te wahine mau moko kauae tuatahi ki te whakakanohi i tētahi kawepūrongo auraki. I te tau 2023 i kopoua ia hei Pouwhiringa mō Te Whare o Pou Tangata, he tūranga e āhei ki te whakatairanga tonutia e ia te reo Māori ki ngā pouaka whakaata o te motu, ki te ao anō hoki.
Kingi Kiriona
Ngāti Ruanui, Ngāti Kahungunu, Ngāti Apa
Ko Kingi Kiriona he kaikōrero, he kaihaka, he kaitito, he kaiako, he kaiwhakapāoho āno hoki. I tōna titiro ki te reo Māori me te ao Māori i kite nei ia he rautaki mō te whakawhanake i te hauora, i te oranga tonutanga o te iwi Māori. He mea poipoi tēnei i a Kingi ki te hanga ētahi ara e puta atu te reo Māori me te ahurea Māori ki ētahi wāhi, inā noa atu ki ngā pakihi, ki te ao pāpāho, ki te rāngai whakatakotoranga, ki te rāngai ako, ki te rāngai hauora anō hoki. I te tau 2023, i kopoua a Kingi hei Tumu Whakarae Tuarua, Mātauranga Māori ki Te Aka Whaiora. Ko tana tūranga he mea whakarite kia whakatairanga ētahi ara hauora Māori e hāngai pū ana ki te mātauranga Māori, te reo, me te tikanga Māori. Kua tata ki te 100 ngā waiata me ngā haka whakaputaina e Kingi. Ko ētahi kua whakamahia hei rauemi ako mō ngā tamariki i ngā kura puta noa i Aotearoa. Inā tata nei, kopoua anō a Kingi ki tana tūranga tuatoru ki te poari whakahaere o Whakaata Māori.
Waha Kōrero i te ao pāpāho
$10k up for grabs as Waha Kōrero celebrates reo Māori excellence
03 Jul 2024
Waha Kōrero: New speech competition for proficient reo Māori speakers | Te Ao Māori News
03 Jul 2024
Waha Kōrero Celebrates Toa Reo Māori
03 Jul 2024
Take Reo | He whakataetae kōrero ā-waha te haere ake nei ki te hunga matatau
09 Sep 2024