Sharron shared a moment

Sharron Handscomb | July 2021

Photo of Sharron | Matariki 2021
I ngā rangi whakatā kua tahā ake nei, i whakatūria e mātou ko tōku hoa tāne, ko tana kaihana me tā māua irāmutu i tētahi kaupapa whakahirahira, arā ko te Matariki ā whānau.

I ngā rangi whakatā kua tahā ake nei, i whakatūria e mātou ko tōku hoa tāne, ko tana kaihana me tā māua irāmutu i tētahi kaupapa whakahirahira, arā ko te Matariki ā whānau. Kua aua atu te roa kia whakanui mātou i a Matariki, ā, kua roa hoki te wā kia nohotahi kia noho a whānau nei mātou ki Wainuiomata. I tīmata te kaupapa i te ahiahi o te Rāhōroi ki te timotimo kai, kēmu Māori, te raweke i te one (sand lightbox) te whakamau tāmoko me te tango whakaahua. Nā tā māua iramutu ētahi mahi toi i hanga/peita hei tuarongo whakaahua, te mīharo hoki o āna mahi!! I whakaritea e te iramutu nei tētahi whare kokorangi whetū mā ngā tamariki. I whakarākeihia tētahi ruma ki ngā whetū o Matariki me Te Kāhui o te Mangaroa.

Ka kai, ka hākari, ka kai anō mātou. Katahi ka wānanga tahi i a Matariki. Ka tākaro kēmu matihiko (kahoot), ka karakia tahi me te tuku i ngā mihi. Ka mutu te pō i te glowstick party me te tuku rākau muramura!! Ka hurō ngā tamariki i te hari me te koa.

I te atapō o te Rātapu i hui anō mātou ki te kawe i te Hautapu, ki te tuku i ngā karakia, ki te tuku i ō mātou mate kia whetūrangitia, ā, ki te tuku hoki i ngā wāwata mō te tau e tū mai nei. Kātahi ka hura i tā mātou umu kohukohu hei whakanui i ngā whetū, a Tupu-a-rangi (heihei) a Tupu-a-nuku (riwai, kumara) a Waitī (Salmon) a Waitā (Hāpuka) He tuatahitanga tēnei kia mātou, ā, ko te manako nui i tika a mātou mahi!!

I a mātou e whakarite ana i te kaupapa nei i whakatakotoria e mātou he manuka ki te whānau, kia tunua he kai e hāngai ana ki ngā whetū, ā, i hikina ake taua manuka e te whānau. Kāre he kupu hei whakaahua ake i ngā kai reka i whakaritea e tō mātou whānau. Kua whakanuia mārika ngā whetū katoa o te kāhui Matariki.

Ka tākaro kēmu Māori anō pērā i ngā tititorea, te whanowhano me ngā tī rākau. I horahia ētahi taongo pūoro pērā i ngā momo koauau, te pūtorino, te porotiti me te pūrerehua hei rawekeweke mā ngā tamariki. Koia kei a rātou te whakatangi taonga pūoro. Hei tērā tau ka hangaia e rātou o rātou ake taonga pūoro.

E mīharo tonu ana te wairua i ngā mahi pārekareka whakahirahira i whakaritea e tō mātou whānau. Ko te whānau te take, ko te apōpō hoki te take. E hīkaka ana tēnei ki ngā hui a whānau e tū mai nei.

He nui ngā whakaahua hei whakaatu i tō mātou "Matariki Moment". Kua whiria tenei whakaahua e whakaatu ana i ngā mahi toi a tā māua iramutu. E poho kererū ana ki a ia me tana arohanui ki te kaupapa nei.

Koia te take o taku tono. He hiahia nōku ki te rau atu i tana ingoa ki te kete whāi koha.

Ko Shaolin Paul tana ingoa e 19 tana pakeke. Ka ora a Matariki a whānau i a ia haere ake nei, haere ake nei.