Kei aku tamariki me aku mokopuna, ka nui te aroha ki a koutou katoa. Kei aku uri kāore anō au kia tutaki, kăore e kore he menemene ātaahua ō koutou e rite ana ki te tākiritanga mai o te rā. E rere tonu ana te aroha ki a koutou. Ko te tau 2025 tēnei. He nui te hunga Māori e āwangawanga ana, e noho pāpouri ana i ngā āhuatanga o te wā. Kei te tāmia tonutia tō iwi Māori e te Pākehā, ā, ara noa atu ngā pakanga huhua e puea ake ana i te ao. Kāore e rerekē ana ki ngā rā o ō koutou tīpuna. Ko te tūmanako nui nei, kua rerekē i tō koutou nā wā. Ahatia. Mehemea he kōrero āku, he whakaaro rānei ōku hei tuku ki a koutou, anei... Kia kaha te kōrero i tō reo Māori. He taonga puipuiaki tēnei kua waiho mai e ō tīpuna ki a au me tōku reanga, nā reira, kawea tonuhia ki tua rāno, ki ō hoa, ō whanaunga, te ao katoa. Mehemea kāore he reo Māori tōu, haere ki te ako. Puritia te taonga nei kia kore rawa e riro. katahi, karua. Kaua rawa e wareware i tō pepeha, tō whakapapa - ko wai koe, nō hea koe. He wīwī, he naati, he whanokē koe. Ahakoa te aha, tautokona, tiakina ō mātua, ko te aroha te mea nui e memeha haere ana i te ao. Taku aroha nui ki a koutou xx Tō kuia xx