He puawai au nō runga i te tikanga. He rau Rengarenga nō roto i te raukura. Ko tōku raukura, e manawanui ki te ao.
He aha te raukura e kiia nei? Ko tōku reo te raukura, ko āku uri ngā raukura, ko tōku Ao Māori te raukura.
Mō ngā tau e maha, kua noho au hei pouako ki te Kura Kaupapa Māori me te kura Reo Rua, ā, ko te reo Māori te tino aronga. Koinei taku oati ki aku raukura kua whakaakongia......He oranga kei roto i tō reo rangatira. Ko KOUTOU te oranga tonutanga o te reo Māori, ka tika me whakamanawa i tērā. Kia kaha ki te whai i ēnei ara kua whakatōkia e ō tātou mātua tūpuna ki a kore e ngaro ahakoa he paku noa, ahakoa he huhua...me ū ki tō reo rangatira hei oranga mōu.
Otinoa ki taku tama! Ko te manakonui, kua mau pūmau koe ki te aka o Te Aho Matua, ki ngā tikanga a kui mā, ā Koro mā. Ko te manako ia, ka whakatipu koe i ō uri ki raro i Te Reo Māori me te whai koha hoki ki ēnei āhuatanga a tātou. I te wā ka pānui koe i tēnei kōrero, kaore e kore ku nunumi au ki te pō e taku tama, kua koroua haere koe, ā, he koroua peange koe ki ō marae maha o Taranaki, ō Waikato hoki. Ko te tino inoi mōku māu, i tipu koe hei raukura mō tō tāua iwi maha me tō whānau ka tika. Hei whakakapi ake, waiho rā ēnei kupu hei oranga māu, mā haku uri hoki.
Ko te reo Māori te tāhūhū o tō tātou whare kōrero xxx
